Праваахоўныя органы ў Парыжы ўжылі вадамёты і слезацечны газ для разгону ўдзельнікаў акцыі «жоўтых камізэлек». Падчас акцыі пратэсту паліцыя затрымала 31 чалавека, паведамляе тэлеканал BFMTV са спасылкай на прэфектуру паліцыі.
«Жоўтыя камізэлькі» пратэстуюць у Парыжы і рэгіёнах Францыі васямнаццатую суботу запар. Нягледзячы на тое што апошнія некалькі тыдняў выступы «жоўтых камізэлек» адбываліся ў адносна спакойным становішчы, сённяшняя акцыя хутчэй нагадвае дэманстрацыі, якія адбываліся ў першыя тыдні пратэсту, адзначае тэлеканал.
Дэманстранты ўжывалі дымавыя шашкі і палілі аўтамабілі. Частка актывістаў у раёне Трыўмфальнай аркі закідала паліцэйскіх камянямі.
Акцыі «жоўтых камізэлек» распачаліся ў Францыі ў лістападзе летась. Пратэстоўцы патрабавалі знізіць кошты на бензін і павысіць заробкі і сацвыплаты. У пачатку снежня французскія ўлады прынялі мараторый на павышэнне коштаў на паліва, а таксама пагадзіліся павысіць памер мінімальнага заробку.
У лютым даследчы цэнтр Elabe на замову тэлеканалу BFMTV правёў апытанне, згодна з якім большасць (56 %) жыхароў Францыі выказаліся за спыненне пратэстных акцыяў «жоўтых камізэлек».
