На прэс-канферэнцыю з нагоды ўвядзення санкцыяў супраць венесуэльскай нафтавай кампаніі PDVSA дарадца амерыканскага прэзідэнта ў пытаннях нацыянальнай бяспекі Джон Болтан прыйшоў з нататнікам, у якім быў запіс: «5000 жаўнераў у Калумбію». Канферэнцыя адбылася 28 студзеня.
Амерыканскія медыі адразу ўхапіліся за гэтыя словы і пачалі абмяркоўваць магчымы варыянт вайсковага ўмяшання ў палітычны канфлікт у Венесуэле.
Калумбія з’яўляецца партнёрам ЗША і мае агульную мяжу з Венесуэлай. У Калумбіі таксама знаходзіцца амерыканскі вайсковы кантынгент – некалькі сотняў жаўнераў.
Выконваючы абавязкі міністра абароны ЗША Патрык Шэнахэн пракаментаваў, заўважаны журналістамі запіс у нататніку Болтана наступным чынам: «мы ўважліва сочым за сітуацыяй».
«Як і раней казаў прэзідэнт, усе варыянты разглядаюцца», – пракаментаваў інцыдэнт з нататнікам афіцыйны прадстаўнік Белага дому.
МЗС Калумбіі заявіла, што нічога не ведае пра план адпраўкі амерыканскіх жаўнераў. Не ведаюць пра гэта і ў Пентагоне, піша washingtonpost.com.
25 студзеня стала вядома, што прэзідэнта Венесуэлы ахоўваюць расейскія наёмнікі з гэтак званых прыватных ваенных кампаніяў. Пра гэта агенцтву «Reuters» распавяла крыніца, блізкая да расейскіх кантрактнікаў. Крэмль зняпраўдзіў гэтую інфармацыю.
ЮВ, belsat.eu, паводле CNN, huffingtonpost.com