НАТО адхіліла абвінавачванні прэзідэнта Беларусі Аляксандра Лукашэнкі аб тым, што ідзе працэс нарошчванне ваеннай моцы альянсу паблізу заходняй мяжы краіны, перадае «Інтэрфакс-Захад».
«Ніякага нарошчвання сілаў НАТО ў рэгіёне няма. Шматнацыянальная прысутнасць НАТО ва ўсходняй частцы Паўночнаатлантычнага саюзу не ўяўляе пагрозы ні для адной краіны. Яна носіць строга абарончы, суразмерны характар і накіравана на перадухіленне канфліктаў і захаванне міру», – гаворыцца ў заяве прэс-сакратара альянсу.
Ён заклікаў беларускія ўлады паважаць асноўныя свабоды, уключаючы права на мірны пратэст, і адзначыў, што ў альянсе ўважліва сочаць за развіццём сітуацыі ў Беларусі.
Тым часам прэс-сакратар АДКБ Уладзімір Зайнетдзінаў заявіў, што Арганізацыя Дамовы аб калектыўнай бяспецы прыме рашэнне аб аказанні дапамогі Беларусі пасля адпаведнага звароту Менску і кансультацый з дзяржавамі – сябрамі АДКБ.
«У сакратарыят АДКБ на дадзены момант пакуль не паступала звароту Беларусі аб аказанні дапамогі. У выпадку паступлення такога звароту ён будзе разгледжаны ў адпаведнасці з вызначаным у арганізацыі парадкам. Рашэнне будзе прынятае пасля правядзення кансультацыяў з усімі дзяржавамі сябрамі АДКБ», – адзначыў Зайнетдзінаў.
Паводле яго словаў, падставай для аказання дапамогі Беларусі з’яўляецца артыкул чатыры Дамовы аб калектыўнай бяспецы і палажэнні Статуту Арганізацыі.
15 жніўня Аляксандр Лукашэнка заявіў, што Расея акажа дапамогу ў выпадку звароту Беларусі дзеля забеспячэння бяспекі ў выпадку вонкавых ваенных пагрозаў. Ён распавёў аб дамоўленасці з Уладзімірам Пуціным аб аказанні ваеннай дапамогі Беларусі ў выпадку неабходнасці.
«Калі гаворка ідзе аб ваенным складніку, у нас ёсць дамова з Расейскай Федэрацыяй у рамках Саюзнай дзяржавы і АДКБ. Як раз гэтыя моманты падыходзяць пад гэтую дамову. Таму сёння з Прэзідэнтам Расеі ў мяне адбылася працяглая, грунтоўная размова аб сітуацыі. Павінен сказаць, мяне нават крыху здзівіла – абсалютна азнаёмлены з тым, што адбываецца», – адзначыў Лукашэнка.
Лукашэнка таксама дадаў, што пры першым звароце з боку Менску Расея гатовая аказаць усебаковую дапамогу па забеспячэнні бяспекі Беларусі.
На мітынгу 16 жніўня Аляксандр Лукашэнка заявіў, што цяпер краіне прапануюць новы ўрад і салдатаў НАТО. «Чарнаскурых, жаўтаротых і белабрысых! Нас хочуць апрануць у лапці і паганяць бізуном! Няўжо вы гэтага не бачыце? Калі хтосьці гэта хоча – без мяне!» – дадаў ён.
Таксама Лукашэнка заявіў, што танкі і самалёты НАТО разгорнутыя ў 15 хвілінах язды ад беларускай мяжы.
МГ/НЯ belsat.eu