15 кастрычніка ў судзе Магілёўскага раёну пачаўся разгляд крымінальнай справы супраць магілёўскага актывіста Станіслава Паўлінковіча. Яго абвінавачваюць у абразе суддзі паводле арт. 391 Крымінальнага кодэксу.
Інцыдэнт адбыўся яшчэ 21 траўня, калі Станіслава Паўлінковіча вывезлі з ізалятара часовага ўтрымання на чарговы суд. Паколькі суд скончыўся не на карысць Паўлінковіча – суддзя суду Ленінскага раёну Аксана Ратнікава прысудзіла яму 15 содняў арышту і 45 б.в. штрафу, актывіста накрыла злосць і ён дазволіў сабе некультурныя выказванні.
«Я быў вельмі ўзрушаны, гаварыў на эмоцыях, віну сваю прызнаю. Я не хацеў абразіць менавіта суддзю Ратнікаву. Мае выказванні хутчэй датычыліся ў цэлым улады. Бо я лічыў і лічу зараз, што мяне пакаралі вельмі жорстка. Можна сказаць, несуразмерна маім дзеянням. У мяне проста здалі нервы, калі я пачуў чарговы вырак», – заявіў на судзе Паўлінковіч.
Дзяржаўны абвінаваўца на судзе 15 кастрычніка заявіў, што Паўлінковіч 21 траўня публічна абразіў суддзю Ратнікаву з мэтай знявагі яе гонару і годнасці з жадання адпомсціць за абвінаваўчы вырак. На думку пракурора словы Паўлінковіча былі выказаны ў рэзкай і грубай форме, іх чулі не толькі суддзя і сакратар, а таксама 2 канваіра.
Суддзя Максім Курпачанка выслухаў абодва бакі і прыняў рашэнне выклікаць у суд сведкаў. Наступнае паседжанне адбудзецца 23 кастрычніка.
Вольга Васільева, Белсат.