Удзельнікаў акцыі з труной, якую 8 траўня ў Менску правялі актывісты «Моладзевага блоку», маглі затрымаць міліцыянты.
Гэтак, з’явілася інфармацыя пра затрыманне Міхася Варанцова.
«Таксама тыя людзі, якія маглі ўдзельнічаць у гэтай акцыі, зараз не выходзяць на сувязь», – адзначыў у каментары belsat.eu прадстаўнік «Моладзевага блоку» Пётр Маркелаў.
Пазней стала вядома, што не выходзяць на сувязь прадстаўнікі «Моладзевага блоку» Даніла Лаўрэцкі і ягоная дзяўчына Лізавета Пракопчык. Не адказвае на тэлефанаванні і Вераніка Яновіч.
Паводле звестак «Вясны», Лізавета Пракопчык знаходзіцца ў ЦІП на Акрэсціна. Яе будуць судзіць у панядзелак, 11 траўня. Паводле актывісткі «Моладзевага блоку» Аланы Гебрэмарыям Даніла Лаўрэцкіі таксама знаходзіцца ў сталічным Цэнтры ізаляцыі правапарушальнікаў на вул. Акрэсціна. Іншыя актывісты, імаверна, утрымліваюцца там жа.
Актывісты «Моладзевага блоку» зладзілі акцыю супраць параду, які адбудзецца ў Менску 9 траўня. Моладзь вырашыла звярнуць увагу на небяспеку наведвання масавых мерапрыемстваў на Дзень Перамогі. З гэтай нагоды падчас рэпетыцыі вайсковай тэхнікі актывісты неслі ў руках труну і танцавалі, трымаючы ў руках сцяжкі колераў дзяржаўнага сцягу.
У «Моладзевым блоку» адзначылі, што акцыю зладзілі на манер папулярнага ў сацсетках мему «танец з труной».
МГ belsat.eu