Басейн з пластыкавым смеццем адкрыецца ў сталіцы 25 верасня роўна на адзін дзень. Такім чынам актывісты маюць намер падтрымаць сусветныя экалагічныя акцыі і адначасова правядуць у сталіцы пікет «Покед, пакет!». Пра акцыю паведамляе агенцтва «Минск-Новости».
«Паплаваць» у басейне, напоўненым пластыкавым смеццем, зможа любы ахвочы. Адначасова грамадскія актывісты і блогеры, апранутыя ў пластыкавыя плашчы, падзеляцца сваймі лайфхакамі: як ветліва адмовіць прадаўцу ад упакоўвання вашага апельсіна ў пластыкавы пакет, куды і як выкідаць выкарыстаныя пакеты, як не выкарыстоўваць лішні пластык. Акцыя ўзгодненая з гарадскімі ўладамі.
Незвычайнае мерапрыемства адбудзецца а 13:00 на пляцоўцы каля галоўнага ўваходу ў гандлёвы цёнтр Dana Mall.
У Беларусі на афіцыйным узроўні вядуцца захады па абмежаванні пластыку. Гэтак міністэрства антыманапольнага рэгулявання і гандлю даручыла да 1 кастрычніка знайсці спосабы замены пластыкавага посуду ў грамадскім харчаванні.
СК belsat.eu