Следчы камітэт расследуе гібель працаўнікоў у цэнтры Менску. Пра гэта паведамляе тэлеграм-канал Менгарвыканкаму.
26 чэрвеня на скрыжаванні праспекту Дзяржынскага і вуліцы Клары Цэткін, дзе завяршаецца пераабсталяванне руху па плошчы Багушэвіча, трое працаўнікоў адной з будаўнічых арганізацыяў пракладвалі электрычны кабель праз праезную частку праспекту. Усіх траіх знайшлі без прытомнасці ў кабельным калодзежы.
Медыкі на месцы пацвердзілі смерць дваіх мужчын. Трэці шпіталізаваны са страсеннем мозгу, закрытай чэрапна-мазгавой траўмай, ранкамі галавы і пляча.
Спецыялісты МНС замералі паветра ў калодзежы на наяўнасць атрутных рэчываў. Перавышэнняў гранічна дапушчальных канцэнтрацыяў небяспечных рэчываў яны не выявілі.
Дэпартамент дзяржаўнай інспекцыі працы Міністэрства працы і сацыяльнай абароны расследуе няшчасны выпадак на вытворчасці са смяротным зыходам, каб даць ацэнку дзеянняў службовых асобаў будаўнічай арганізацыі.
МГ belsat.eu
