У Менску судзяць удзельнікаў акцыі салідарнасці з прафсаюзам РЭП

ВІДЭА

Затрыманні

Затрыманні каля суда, дзе лідараў незалежнага прафсаюзу РЭП пакаралі 4 гадамі «хатняй хіміі». Стрым

Publiée par «Белсат» sur Vendredi 24 août 2018

27 жніўня ў судзе сталічныя суды разглядаюць справы затрыманых за акцыю каля Дому правасуддзя. Сярод іх – апазіцыйны лідар Мікола Статкевіч (суд Ленінскага раёну).

Акцыя салідарнасці адбылася 24 жніўня – пасля вынясення прысуду лідарам прафсаюзу РЭП. Актывістаў, якія пратэставалі супраць абвінаваўчага прысуду, затрымалі. Выходныя яны правялі ў ізалятары часовага ўтрымання.

27 жніўня затрыманых актывістаў даставілі ў розныя суды Менску.

ПЦ «Вясна» падаў спіс затрыманых: Мікола Статкевіч, Алесь Абрамовіч (Барысаў), Вольга Нікалайчык, Леанід Кулакоў, Мая Наумава, Уладзімір Неўмяржыцкі, Павел Мрочка (Брэст), Аляксандр Чмыхаў (Бабруйск), Максім Вінярскі, Тамара Зайцава (Калінкавічы), Андрэй Хрэнкоў.

Алеся Абрамовіча, які мае інваліднасць, вызвалілі яшчэ ў пятніцу і ўручылі яму позву з’явіцца ў суд у панядзелак аб 11-ай.

Пратаколы на затрыманых складалі паводле арт. 23.34 («Парушэнне парадку арганізацыі або правядзення масавых мерапрыемстваў»), але на Маю Навумаву склалі пратакол яшчэ і за «дробнае хуліганства».

Навумавай у РУУСе стала дрэнна і яна патрабавала хуткую дапамогу. Супрацоўнік міліцыі, якая апытвала актывістку і складала пратакол правапарушэння, адмовілася выклікаць хуткую, а калі Мая працягвала настойваць – атрымала другі артыкул. Пазней хуткую выклікалі, але ў шпіталізацыі ёй адмовілі.

Паводле праваабарончага цэнтра «Вясна», актывістаў Маю Навумаву і Леаніда Кулакова аштрафавалі на 40 базавых велічыняў кожнага ў судзе Першамайскага раёну. Іх адміністрацыйныя справы разглядалі суддзі Юры Гарбатоўскі і Хведарук.

24 жніўня па рэзананснай «справе прафсаюзаў» суд Савецкага раёну вынес абвінаваўчыя прысуды Генадзю Фядынічу і Ігару Комліку. Ім прызначылі чатыры гады гэтак званае «хатняе хіміі», абавязалі выплаціць на карысць дзяржавы больш за 47 тысячаў рублёў і забаранілі займаць кіроўныя пасады цягам найбліжэйшых пяці гадоў.

НМ, belsat.eu

Глядзі таксама
Каментары