Утульная сяброўская атмасфера, беларуская мова ды нацыянальныя традыцыі, карагоды і гульні са святым Міколам для самых маленькіх. У Менску прайшла традыцыйная беларуская ялінка ад «Нашых дзетак». Сёлета свята праводзілі ўжо 12-ы раз.
КРЫСЦІНА ВІТУШКА, АРГАНІЗАТАРКА ЯЛІНКІ:
«У гэтым годзе я думала, што арганізоўваць ужо не буду, бо мой сын вырас, і для яго такі фармат ранішніка не зусім блізкі. Яму хочацца дыскатэкі, нечага такога падлеткавага. Але тэлефанаванняў было так шмат, і людзі так прасілі, таму мне стала няёмка, і я вырашыла, што ўсё ж трэба рабіць».
Беларуская ялінка сабрала вакол сябе каля сотні дзетак самага рознага ўзросту. Акрамя Вітушак да арганізацыі ранішніку далучыліся сем’і, якія ўдзельнічалі ў першых ялінках яшчэ 12 гадоў таму.
УДЗЕЛЬНІКІ ЯЛІНКІ
«Прыемная, цёплая атмасфера. У прынцыпе, за тым і ішлі».
«Мы тут другі ўжо год, бо тут ялінка беларускамоўная. І больш такой няма нідзе».
«Мне вельмі ўсё падабаецца тут. І цукеркі, і сябры мае тут. Усё проста цудоўна. І мова родная».
«Мне даводзілася выступаць у месцах, дзе аўдыторыя наагул не паважае спевака. І я неяк выжываў. А тут усё было лёгка».
Падчас свята арганізатары праводзілі майстар-класы вырабу зімовых птушак з воўны ды святочных аўтарскіх свечак. Удзельнікаў вітаў і навагодні кірмаш, дзе можна было набыць калядныя сувеніры. Шмат з гэтых сувеніраў было зроблена рукамі ўдзельнікаў свята – дзяцей.
Віталь Бабін, «Белсат»
