Аператары нафтаправоду «Дружба» сабраліся 26 красавіка ў канцэрне «Белнафтахім» у Менску, каб абмеркаваць урэгуляванне транзіту расейскай нафты. На перамовы прыбылі прадстаўнікі Польшчы, Украіны і расейскага аператара «Транснефть».
Беларускі бок прадставіць прапановы па тэхнічным рашэнні праблемы прыпынення транзіту нафты з Расея, заявіў старшыня «Белнафтахіму» Андрэй Рыбакоў, перадае ТАСС.
Паводле яго, беларускі бюджэт і нафтатранспартныя арганізацыі нясуць страты ад прыпынення транзіту. Рыбакоў адзначыў, што няякасная сыравіна прывяла да пазаштатнай працы беларускіх НПЗ, зніжэння выпрацоўкі нафтапрадуктаў і невыканання кантрактных абавязацельстваў перад спажыўцамі.
Ён падкрэсліў патрэбу выпрацаваць адпаведныя рашэнні праблемы, аднаўленне паставак якаснай сыравіны на НПЗ і транзіту нафты.
У сваю чаргу намеснік міністра энергетыкі РФ Павел Сарокін выказаў упэўненасць у тым, што праблемы транзіту нафты з РФ па нафтаправодзе «Дружба» вырашацца ў канструктыўным ключы.
Ён падкрэсліў, што ўсе ўдзельнікі сустрэчы з’яўляюцца спажыўцамі і карыстальнікамі адзінай сістэмы магістральных нафтаправодаў і ад гэтага залежыць бяспека энергазабеспячэння істотнай часткі Еўропы. На яго думку, вялікая праца, якая была праведзеная для падрыхтоўкі гэтай сустрэчы, дапаможа прыйсці да хуткага эфектыўнага рашэнню для ўсіх бакоў.
МГ belsat.eu