Трое мужчынаў у Менскім раёне забілі двух цяжарных самак аленя і аднаго самца.
Стрэлы ў полі пачулі мясцовыя жыхары і паведамілі пра гэта егеру і дзяржінспектару. Там жа былі заўважаныя трое мужчынаў, аднак у цемры ў іх атрымалася ўцячы. Пры абследаванні месца незаконнага палявання інспектары Менскай вобласці знайшлі на полі тушы трох аленяў, дзве з іх браканьеры паспелі разрэзаць.
На дарозе недалёка ад месца здарэння стаяў аўтамабіль «Форд», на яго заднім сядзенні былі бачныя рассыпаныя стрэляныя гільзы. Дзяржінспектары высветлілі, што кіроўца гэтага аўтамабілю ўжо двойчы прыцягваўся за парушэнні правілаў палявання і быў пазбаўлены правоў на паляванне. Цяпер мужчыну падазраюць у браканьерстве з прычыненнем шкоды ў асабліва буйным памеры – амаль 37 тысяч рублёў.
Таксама ў салоне аўтамабілю знайшлі 13 стрэляных гільзаў і 6 патронаў да наразной зброі, у багажніку знаходзіліся пустыя пластыкавыя скрыні, следчыя мяркуюць, што яны маглі прызначацца для перавозкі мяса. Цяпер аўтамабіль канфіскаваны, з ім працуюць эксперты, а падазраваны змешчаны ў ізалятар.
ГА, belsat.eu паводле gosinspekciya.gov.by. Фота: REUTERS / Toby Melville / FORUM