28 лютага з 9 гадзінаў раніцы ў Менскім інфекцыйным шпіталі ўвялі каранцін. З гэтага моманту наведванне хворых і ўваход на тэрыторыю больніцы забаронены, піша Інтэрфакс.
Менскі гарадскі інфекцыйны шпіталь часова спыніў планавы прыём пацыентаў, акрамя пацыентаў дыспансернага аддзялення па ВІЧ і дыспансернага кабінета па гепатыту, якія маюць патрэбу ў выдачы лекавых сродкаў для працягу лячэння.
У шпіталі цяпер знаходзіцца інфікаваны на каронавірус студэнт з Ірану, а таксама асобы, з якімі ён меў зносіны.
Каранцін уведзены з 28 лютага з 9 гадзіны раніцы.
Аналагічная захада ўжытая і ў дачыненні да інтэрнатаў БНТУ. Наведванне тут забараняецца на нявызначаны тэрмін.
27 лютага ў студэнта з Ірану, які навучаецца ў БНТУ, афіцыйна пацвердзілі наяўнасць каронавірусу. Грамадзяніна Ірану і асобаў, з якімі ён кантактаваў, змясцілі ў Менскі інфекцыйны шпіталь. Медыкі паведамляюць, што інфікаваны пачувае сябе здавальняюча.
Студэнт з Ірану прыбыў у Беларусь 22 лютага.
Што рабіць, каб не падхапіць заразу?
- Абавязкова трэба мыць рукі з мылам. Чым часцей, тым лепш! Але рабіце гэта правільна. Тут інструкцыя.
- Не дакранайцеся да рота і твару нямытымі рукамі.
- Узмацняйце імунітэт.
- Лепш не цалавацца і не паціскаць рукі.
- Пазбягайце кантактаў з хворымі.
- Калі ёсць магчымасць, то насіце маску. Мяняйце яе раз на дзве гадзіны.
- Карыстайцеся дэзынфектарамі на спіртавой аснове.
- Праветрывайце памяшканні, у якіх вы жывяце і працуеце.
- Тлумачце дзецям, чаму варта мыць рукі!
СК belsat.eu
