Колькасць вайскоўцаў з нашай краіны ў межах міратворчай місіі ААН у Ліване можа вырасці, падае Міністэрства абароны.
21–23 траўня беларускія вайскоўцы наведалі Ліван і Сірыю. Дэлегацыю ўзначаліў памочнік міністра абароны па пытаннях міжнароднай ваеннай супрацы Алег Воінаў.
Падчас візіту Воінаў абмеркаваў з кіраўніцтвам Часовых сілаў ААН у Ліване і ліванскімі вайскоўцамі перспектывы павелічэння беларускага кантынгенту ў складзе місіі.
«Падчас гэтых сустрэчаў абмяркоўваліся пытанні паўсядзённай жыццядзейнасці беларускіх вайскоўцаў, а таксама перспектывы пашырэння ўдзелу Беларусі ў складзе гэтай місіі», – гаворыцца ў паведамленні.
У міратворчай місіі ААН у Ліване служыць каля 10 тысячаў чалавек. Мэта місіі – прыцягненне міжнароднай увагі для аказання дапамогі ліванскаму войску і перадача поўнай адказнасці ліванскім вайскоўцам за бяспеку ў краіне.
Беларускі кантынгент – пяць чалавек – прадстаўлены ў складзе місіі лекарамі і медсёстрамі.
ДД belsat.eu
