У Свярдлоўскім раённым судзе Бішкеку скончыўся працэс у гучнай крымінальнай справе аб мадэрнізацыі сталічнай ЦЭЦ. Пра гэта паведамляе 24.kg.
У межах справы былога прэмʼер-міністра Кыргызстану Сапара Ісакава, які займаў сваю пасаду ў 2017-2018 гадах, 6 снежня прысудзілі да 15 гадоў пазбаўлення волі. Ён, паводле абвінавачвання, загадзя ведаў, што прапанова мадэрнізацыі ЦЭЦ не адказвала інтарэсам краіны з прычыны завышанай цэны, тэхнічных і тэхналагічных недахопаў.
Яшчэ аднаго прэмʼер-міністра Жантаро Сатыбалдзіева, які ўзначальваў урад у 2012-2014 гадах, прысудзілі да 7,5 года пазбаўлення волі.
Былога міністра энергетыкі Асманбека Артыкбаева суд прыгаварыў да штрафу ў 5 млн сомаў ($ 71,5 тыс.), былога міністра фінансаў Вольгу Лаўрову – 3 млн сомаў ($ 43 тыс.).
Таксама былі асуджаныя былы кіраўнік Нацыянальнага энергахолдынгу Айбек Каліеў (на 15 гадоў), былы генеральны дырэктар ААТ «Электрычныя станцыі» Салайдзін Авазаў (11 гадоў і 3 месяцы) ды іншыя.
Справа аб карупцыі пры мадэрнізацыі Бішкекскай ЦЭЦ была ўзбуджаная ў студзені 2018 года. Яна датычыць кітайскага крэдыту ў памеры $ 386 млн. Усім фігурантам былі выстаўленыя абвінавачванні па фактах злоўжывання службовым становішчам і карупцыі. Іх вінавацілі ў нанясенні шкоды дзяржаве ў памеры $ 111 млн пры заключэнні кантракту з кітайскай кампаніяй.
15 жніўня 2019 года Ваенная пракуратура выставіла абвінавачванне ў карупцыі пры мадэрнізацыі сталічнай электрацэнтралі былому прэзідэнту краіны Алмазбеку Атамбаеву.
МГ belsat.eu
