Здарэнне адбылося 1 лютага каля адной з крамаў на ўсходзе ўкраінскай сталіцы. Паводле паліцыі, паміж трыма мужчынамі адбылася слоўная сварка, адзін з іх хацеў стрэліць у апанента, але патрапіў у твар дзіцяці, якое выходзіла з крамы з мамай.
Паліцыянты затрымалі зламысніка, падае «Сегодня». Супраць яго распачалі крымінальную справу за хуліганства. Мужчыну пагражае ад трох да сямі гадоў пазбаўлення волі.
Хлопчыка шпіталізавалі. Зараз яму аказваюць неабходную медычную дапамогу. Паводле некаторых украінскіх медыяў, куля патрапіла яму ў вока.
Страляніна становіцца ўсё больш шырокай з’явай ва Украіне. У пятніцу ў Дняпры ўзброены мужчына ўзяў у закладнікі 12-гадовую дзяўчынку.
У мінулую нядзелю падчас спрэчкі ў рэстарацыі агнём з пісталету п’яны мужчына параніў дваіх ахоўнікаў.
Нядаўна генеральны пракурор Юрый Луцэнка выступіў за легалізацыю зброі ў краіне. Паводле яго, у людзей на руках – ад 3 да 5 мільёнаў адзінак зброі, якую практычна немагчыма выявіць. Таму, на думку Луцэнкі, зброю трэба ўзаконіць.
ДД