У Кіеве развіталіся з ваенным медыкам, выхадцам з Беларусі, які загінуў на Данбасе
Медык-сяржант Мікалай Ільін загінуў пад пасёлкам Зайцава Данецкай вобласці. Разам з групай вайскоўцаў ён спрабаваў эвакуяваць з «шэрай зоны» загінулага байца, але трапіў пад абстрэл сепаратыстаў.
36-гадовы Мікалай Ільін нарадзіўся ў Беларусі. У 2006 годзе, як кажуць яго сябры, з-за палітычных пераследаў ён пераехаў у Эстонію, дзе пазней атрымаў эстонскае грамадзянства. Ва Узброеных сілах Украіны служыў па кантракце, у 35-й асобнай брыгадзе марской пяхоты.
Загінуў Мікалай 13 ліпеня, падчас спробы эвакуяваць цела загінулага байца.
«Загінуў афіцэр, які знаходзіўся ў «шэрай зоне». Была арганізаваная эвакуацыя цела, і ў гэты час адбыўся абстрэл гэтых хлопцаў. Яны былі з беламі павязкамі, у белах касках. І Мікалай быў сярод іх. Таксама загінуў сяржант Журавель», – распавёў вайсковец Аркадзь Сцепаненка.
Развітанне з Мікалаем Ільіным праходзіла ў саборы Святога Аляксандра ў цэнтры Кіева. Туды прыехалі яго сябры, калегі, блізкія.
«Ён быў шчыры, пазітыўны, светлы чалавек. І абсалютна ніхто не чакаў, што на гэтай гібрыднай вайне так подла забілі Мікалая, парушаючы ўсё, што толькі можна, Жэнеўскія канвенцыі», – сказаў кіраўнік Руху салідарнасці «Разам» Вячаслаў Сіўчык.
«У нас больш платанічныя былі адносіны, ён вельмі паважаў і любіў мяне, я сапраўды гэтак жа», – падзялілася дзяўчына Мікалая Любава Наканечная.
«Ён жыў медыцынай, ён ратаваў хлопцаў. Ён павінен быў прыехаць на наступным тыдні, мы павінны былі ў Львоў да сяброў ехаць. Ён мне тэлефанаваў у панядзелак, перад гібеллю, хацеў са мной пагаварыць, ён адчуваў, што нешта не так будзе, але ён жыў гэтым. Ён казаў: «Я павінен тут быць, дапамагаць хлопцам, таму што гэта вельмі трэба», – успамінае Любава.
«Ён не з’яўляўся грамадзянінам Украіны, але не кожны грамадзянін Украіны можа так дзейнічаць, як дзейнічаў грамадзянін Эстоніі. За той час, які ён пражыў ва Украіне, ён стаў самым сапраўдным патрыётам нашай краіны», – распавёў калега Мікалая Сяргей.
Прыйшлі развітацца з Мікалаем і незнаёмыя з ім людзі:
«Я валанцёр, сёмы год з параненымі і для мяне любая смерць за Радзіму вельмі важная, і аддаць даніну павагі чалавеку для мяне святы абавязак».
«Лічу сваім абавязкам аддаць даніну памяці беларусу, які загінуў, змагаючыся з нашым агульным ворагам – Расеяй».
Пасля развітання, у гадзіну дня, на Байкавых могілках прайшла крэмацыя цела загінулага. Па словах Любавы, прах Мікалая плануюць развеяць ва Украіне, Беларусі і Эстоніі.
Марына Ступак/ІР Belsat.eu
