У Кіеве ў чацвер, 30 траўня, запланаваны канцэрт беларускага стэндап-коміка Івана Усовіча, які раней выступаў з канцэртам у анексаваным Крыме.
Канцэрт запланаваны ў кіеўскім бары NORMAL. Менеджар бара пацвердзіла belsat.eu, што на заўтра плануецца канцэрт стэндапераў, у якім бярэ ўдзел і Іван Усовіч. Але працягваць размову жанчына не захацела.
Анонс выступу апублікаваны на афіцыйнай старонцы коміка ў Instagram.
Паводле дадзеных украінскага сайта па продажы квіткоў, яшчэ адзін выступ Усовіча запланаваны ў Кіеве 19 ліпеня.
Стэндапер выступаў у верасні 2016 года ў Сімферопалі ў бары TorTuga. Відэа з ім апублікаванае на старонцы ўстановы у сацсетцы «Вконтакте». Усовіч неаднаразова наведваў Кіеў пасля свайго крымскага выступу.
Украіна забараняе ўезд грамадзянам іншых краін, што наведвалі Крым не праз афіцыйныя ўкраінскія пункты памежнага кантролю.
ОК/ЛБ/МВ, belsat.eu
