Іракскія вайскоўцы вызвалілі каля 1,5 тысячы вязняў з падземнай турмы экстрэмісцкай групоўкі «Ісламская дзяржава».
Як распавёў агенцтву «France-Presse» палкоўнік паліцыі Іраку Фадэль Німраві (Fadel Nimravi), турму знайшлі ў правінцыі аль-Анбар (Al Anbar), на подступах да гораду Гійт (Hit), які застаецца пад кантролем баевікоў «Ісламскай дзяржавы».
Паводле спадара Німраві, у турме былі 1,5 тысячы вязняў – іх усіх вызвалілі. Прадстаўнік адміністрацыі правінцыі аль-Анбар паведаміў, што большасць зняволеных – мірныя жыхары.
З сярэдзіны сакавіка іракскія вайскоўцы вядуць барацьбу за горад Гійт, які ляжыць на беразе ракі Эўфрат (Euphrates) недалёка ад авіябазы Айн аль-Асад (Ayn al-Asad) і мае стратэгічна важнае значэнне.
За апошнія месяцы іракскія вайскоўцы здолелі атрымаць шэраг перамог у барацьбе з «ІД». У канцы снежня армія ўзяла сталіцу правінцыі аль-Анбар – горад Рамадзі (Ramadi).
Як чакаецца, пасля аднаўлення кантролю над горадам Гійт іракскія вайскоўцы пачнуць шырокамаштабную аперацыю дзеля вызвалення ад джыхадыстаў гораду Фаллюджы (Fallujah).
З канца сакавіка іракскія вайскоўцы спрабуюць вызваліць горад Масул (Mosul), захоплены баевікамі экстрэмісцкай групоўкі «Ісламская дзяржава» амаль два гады таму.
МЯ, паводле bbc.com