У Грузіі пратэстоўцы пайшлі на штурм парламенту

ВІДЭА

Увечары 20 чэрвеня ўдзельнікі антырасейскай акцыі пратэсту ў Тбілісі ўварваліся ў будынак парламента Грузіі. Паліцыя спрабуе спыніць іх, паведамляе выданне «Грузия Online».

Выданне адзначае, што паліцыя не ўжывае дубінкі або іншыя спецсродкі, спрабуючы мірна выцесніць удзельнікаў акцыі (прыкладна 100 чалавек) з тэрыторыі парламента.

Раней грузінская апазіцыя дала кіроўнай партыі тэрмін у 1 гадзіну для адстаўкі трох высокапастаўленых чыноўнікаў – старшыні парламенту Іраклія Кабахідзэ, кіраўніка МУС Георгія Гахарыі і кіраўніка Службы дзяржбяспекі Вахтанга Гамелауры.

Пасля заканчэння гэтага тэрміну пратэстоўцы пайшлі на штурм будынку парламенту.

20 чэрвеня ў Тбілісі і Батумі пачаліся пратэстныя акцыі пасля таго, як у грузінскім парламенце выступіў расейскі дэпутат Дзярждумы Сяргей Гаўрылаў.

Антырасейская акцыя пратэсту ў Тбілісі. Фота Georgia Today

Ён прамаўляў на пасяджэнні Міжпарламенцкай асамблеі праваслаўя з месца, прызначанага для спікера парламенту. Яго перапынілі апазіцыйныя дэпутаты і запатрабавалі, каб расейская дэлегацыя пакінула парламент. Сябры партыі «Еўрапейская Грузія» назвалі Расею акупантам і пакінулі залу.

Патрабаванні адстаўкі топавых чыноўнікаў апазіцыянеры высунулі адразу ж пасля гэтага.

КА belsat.eu

Глядзі таксама
Каментары