На поўначы Грэцыі ў суботу, 6 красавіка, працягнуліся сутыкненні паміж паліцыяй і мігрантамі, якія спрабавалі трапіць на тэрыторыю суседняй Паўночнай Македоніі. Сітуацыя на мяжы ўскладнілася яшчэ ў чацвер. У гэты дзень сотні бежанцаў, у тым ліку з дзецьмі, прыбылі да лагеру мігрантаў Дзіавата, недалёка ад мяжы з Паўночнай Македоніяй, і пачалі разбіваць намёты на полі побач з ім.
Прычынай з’яўлення мігрантаў стала распаўсюджанне ў сацыяльных сетках інфармацыі пра адкрыццё памежнага пераходу для мігрантаў, піша dw.com. Заявы міністра міграцыі Дзімітрыса Вітсаса пра тое, што гэта хлусня, і мяжа не адкрыецца, не былі пачутыя. Мігранты адмаўляліся сыходзіць, нягледзячы на заклікі чыноўнікаў вярнуцца ў афіцыйныя цэнтры размяшчэння. Уцекачы незадаволеныя павольнай працэдурай прадстаўлення прытулку ў Грэцыі, а таксама ўмовамі ў перапоўненых цэнтрах часовага размяшчэння.
Мігранты неаднаразова спрабавалі прарваць паліцэйскія кардоны вакол лагеру і прарвацца да дарогі, якая вядзе да мяжы. Мігранты кідалі ў супрацоўнікаў органаў правапарадку камяні і бутэлькі, а паліцыя выкарыстала ў адказ слезацечны газ.
Балканскі маршрут зачынены
Цяпер Грэцыі ў спецыяльных цэнтрах і лагерах знаходзяцца дзясяткі тысячаў уцекачоў, у асноўным з Сірыі, Іраку і Афганістана. У 2016 годзе балканскія краіны зачынілі свае межы. Згодна з дублінскім пагадненнем, разглядаць заяўку на прадстаўленне прытулку ўцекачам павінна першая краіна ЕЗ, у якую трапляе прэтэндэнт.
СК belsat.eu
