У Горадні знеслі чарговую пярліну драўлянай архітэктуры
У Горадні знеслі чарговую пярліну драўлянай архітэктуры☹«Дом Капылова» гарадскія ўлады вырашылі знішчыць пад покрывам цемры.Унікальны для гораду прыклад рускага драўлянага мадэрну пачатку XX ст. так і не атрымаў статусу помніка архітэктуры, таму ягоны лёс быў вызначаны.Падрабязней: https://naviny.belsat.eu/news/u-goradni-znesli-chargovuyu-pyarlinu-draulyanaj-arhitektury/
Opublikowany przez Белсат TV Czwartek, 19 grudnia 2019
«Дом Капылова» на вул. Валковіча, 23 гарадскія ўлады вырашылі знішчыць пад покрывам цемры: знос пачаўся а 6:00 ранку. Унікальны для гораду прыклад рускага драўлянага мадэрну пачатку XX ст. так і не атрымаў статусу помніка архітэктуры, таму ягоны лёс быў вызначаны.
Нягледзячы на тое, што знос пачаўся фактычна яшчэ ноччу, ля будынку сабраліся журналісты ды неабыякавыя жыхары гораду. Некаторыя спрабавалі падыходзіць да будаўнікоў і тлумачыць, што тыя робяць злачынства. Калі пачала працаваць тэхніка, некалькі жанчын наўпрост заплакалі.
Тамара Марціросава, якая ўсё жыццё пражыла ў Горадні на вул. Леніна, абураная дзеяннямі ўладаў і кажа, што гарадское кіраўніцтва само і давяло дом да аварыйнага стану. А зараз будзе прыкрывацца дзецьмі, каб, імаверна, збудаваць на гэтым месцы тыпавы катэдж для шматдзетных сем’яў. Жанчына плануе пісаць заяву ў пракуратуру, каб там больш пільна прыгледзеліся да сітуацыі вакол зносу.
«Падобныя зносы – гэта агульны трэнд невядома ўжо колькі гадоў, – канстатуе краязнаўца і экскурсавод Эдвард Дмухоўскі. – Яны прыехалі, занялі горад як чужынцы, зносяць аўтэнтыку, а нам распавядаюць, што Горадня, маўляў, у вайну моцна пацярпела… Гэтым часам самі і руйнуюць: як злодзеі, сярод ночы. Свае так не робяць!»
Паводле Дмухоўскага, Горадня і гарадзенцы губляюць зараз тое нешматлікае, што засталося. Асабліва гэта тычацца раёну «Новы Свет», які ад пачатку складаўся з драўляных і мураваных будынкаў канца XIX пачатку XX стагоддзяў, дзе заўжды панаваў свой непаўторны дух.
Паводле краязнаўцы, у Еўропе драўляныя будынкі нават у горшым стане захоўваюцца, даглядаюцца, уносяцца ў спісы ЮНЭСКО: што ў Нарвегіі, што ў Вільні.
Старшыня Гарадзенскага гарвыканкаму Мечыслаў Гой настойвае на тым, што будынак быў у аварыйным стане, таму яго і знеслі. Насуперак чаканням мясцовых жыхароў, на гэтым месцы не плануецца збудаваць катэдж сямейнага тыпу, а саму вызваленую пляцоўку прададуць з аўкцыёну. Паводле Гоя, новы ўласнік і забудоўшчык павінны будуць аднавіць архітэктурныя рысы знішчанага будынку.
Нагадаем, што двухпавярховы будынак па Валковіча, 23 мае больш як 100-гадовую гісторыю і вядомы як «Дом Капылова». Будынак быў адметны шматлікімі разнымі дэталямі ў стылі рускага мадэрну. Таксама ў ім было мноства каваных і літых па-мастацку аформленых металічных дэталяў, якія часткова былі раскрадзеныя яшчэ пасля адсялення жыхароў, часткова – дэмантаваныя перад зносам рабочымі.
Алесь Кіркевіч, фота Васіль Малчанаў Belsat.eu