У Горадні затрымалі каля 100 супрацоўнікаў «Горадні Азот»

У Горадні затрымалі каля 100 супрацоўнікаў прадпрыемства «Горадня Азот», паведамляе TUT.BY.

– Кагосьці затрымлівалі на тэрыторыі заводу, кагосьці на падыходзе каля прахадной. Цяпер усіх выпускаюць па адным. Пратаколаў па 23.34 не складаюць. Аднак складаюць пратаколы апытання і затрымання. У некаторых забралі тэлефоны, – распавялі рабочыя, якія выйшлі з РАУСа.

Работнікі «Горадня Азот» страйкуюць на прадпрыемстве. Горадня. 19 жніўня, 2020 г. Фота: Васіль Малчанаў / Belsat.eu

Таксама мужчыны кажуць, што кожнага затрыманага заводзяць да пракурора на размову пра недапушчальнасць парушэння заканадаўства аб масавых мерапрыемствах і заклікі да забастовак. Усяго затрымана было каля ста чалавек.

Да РАУСа таксама прыехаў аўтобус «Горадні Азот», каб адвезці рабочых на працу. Пра сітуацыю на заводзе распавёў адзін з супрацоўнікаў, які прыехаў падтрымаць калег:

– На некаторых цэхах на заводзе, то цяпер там змены дагэтуль не прымаюць, супрацоўнікаў у памяшканні «загналі», але праца не ідзе.

  • Пратэсты на «Горадня Азоце» пачаліся ад раніцы 26 кастрычніка. Яны сталі адказам на заклік Святланы Ціханоўскай далучыцца да Народнага Страйку і патрабаваць адстаўкі Аляксандра Лукашэнкі.

АА belsat.eu

Hавiны