Сёння гарвыканкам адказаў на заяўку актывістаў, якую яны падавалі 1 сакавіка. Улады Горадні зрабілі гэта ў апошні магчымы паводле заканадаўства дзень.
«Сёння мы атрымалі ўзгадненне на правядзенне свята. Плануем мітынг і канцэрт. Гарвыканкам адмовіўся забяспечваць міліцыю, ахову і медыкаў, таму павінны будзем самі пакрыць гэтыя кошты. Пра гэта таксама паведамім ўвечпры ці заўтра зранку.
Таксама як і ў мінулым годзе нам дазволілі выкарыстоўваць нацыянальную сімволіку», – распавёў belsat.eu адзін з арганізатараў мерапрыемства Вадзім Саранчукоў.
Праграму свята агучаць найбліжэйшымі днямі.
Раней мясцовыя ўлады адмовілі арганізатарам святкавання зладзіць Дзень Волі ў цэнтры гораду – у парку Жылібэра.
Трэці год запар гарадскія ўлады даюць магчымасць гарадзенцам сабрацца з нагоды Дня Волі. Да гэтага 15 гадоў чыноўнікі адмаўлялі грамадзянскім актывістам у правядзенні мітынгаў, шэсцяў і пікетаў, права на якія гарантавана Канстытуцыяй.
Апазіцыйныя палітыкі заяўляюць, што святкаванне Дня Волі ў Менску пройдзе 25 сакавіка з 16-ай да 21-ай гадзіны вечара і адбудзецца незалежна ад таго, ці дасць на гэта ўлада свой афіцыйны дазвол.
ДР belsat.eu