Да журналістаў «Белсату» трапіла копія дакументу, паводле якога у Гомлі школьнікаў і студэнтаў у «добраахвотна-прымусовым парадку» адпраўлялі на прапагандысцкі фільм «28 панфілаўцаў».
Гэта зварот дырэктара «Гомелькінавідэапракату» да кіраўніка ўпраўлення адукацыі Гомельскага аблвыканкаму. Генеральны дырэктар просіць чыноўніка «пасадзейнічаць у шырокім паказе» расейскага мастацкага фільма.
Прэмʼерныя паказы стужкі пачаліся 24 лістапада і працягнуцца да 8 снежня.
«28 панфілаўцаў» распавядае гісторыю байцоў 4-ай роты 316-ай стралковай дывізіі генерал-маёра Панфілава, якія нібыта ў 1941-ым годзе падчас абароны Масквы цаной уласных жыццяў знішчылі 18 танкаў вермахту.
Паводле гісторыкаў і архіўных дакументаў, лёс гэтай гераічнай групы – міф, а подзвіг панфілаўцаў – выдумка карэспандэнтаў «Красной звезды». Пра гэта сведчаць дакументы яшчэ сталінскага перыяду, якія летась апублікаваў Дзяржаўны архіў Расеі.
Стужка была створаная на ахвяраванні расейцаў, беларусаў, казахаў ды ўкраінцаў. Амаль $ 600 тыс., то бок больш за палову сродкаў, сабралі праз краўдфандынг.
ДР belsat.eu