У некаторых актывістаў адключылі святло і дзяжураць пад дзвярыма міліцыянты.
Давераная асоба кандыдаткі ў прэзідэнты Святланы Ціханоўскай у Гомлі Юрый Уласаў удзень 6 жніўня паведаміў пра тое, што ў яго пад’ездзе поўна міліцыі, супрацоўнікі стаяць па двое на ўсіх пляцоўках. Актывісту ў кватэры адключылі электрычнасць. Увечары стала вядома, што яго затрымалі.
У абед 6 жніўня затрымалі яшчэ аднаго актывіста кандыдаткі, Дзмітрыя Івашкіна, у пасёлку Краснае па вуліцы Палявая. Затрымлівалі міліцыянты на двух службовых мікрааўтобусах.
Таксама ў Мазыры 6 жніўня затрыманыя два актывісты Святланы Ціханоўскай Руслан Парфёнаў і Юрый Панфіленка. Яны бралі ўдзел у зборы подпісаў за кандыдатку, арганізацыі пікетаў, рабілі онлайн-трансляцыі для каналу «Мазыр для жыцця». Міліцыя шукае яшчэ аднаго мазырскага адміністратара каналу Аляксандра Цуканава (актывіст адсядзеў ужо 45 содняў за ўдзел у сустрэчы з блогерам Сяргеем Ціханоўскім).
Шмат актывістаў, у тым ліку і давераная асоба кандыдаткі Таццяна Канеўская сышлі са сваіх хат каб іх прэвентыўна не затрымалі міліцыянты.
Раней у Гомлі і вобласці былі затрыманы Уладзімір Няпомняшчых, Юрый Кавалёў, Мікалай Віткоўскі, Міхаіл Маслаў, Аляксей Елісееў, Яўген Васількоў.
ЛШ Belsat.eu