Гомельскія следчыя завяршылі расследаванне крымінальнай справы ў дачыненні да 40-гадовага грамадзяніна Расеі, які вербаваў гамяльчанак для занятку прастытуцыяй. Цяпер справу накіруюць у суд.
«У пачатку верасня непрацуючы жыхар г. Сокал Валагодскай вобласці, 1978 года нараджэння, прыехаў у Гомель у пошуках маладых асобаў для далейшай працы жрыцамі кахання на тэрыторыі Расейскай Федэрацыі, – паведамляецца на сайце УУС Гомельскага аблвыканкаму, – Дзве гамяльчанкі пагадзіліся паехаць за доўгім рублём, што абяцаў працадаўца. Але план перапраўкі будучых сэкс-рабынь праваліўся днём 2 кастрычніка 2018 года. У Добрушскім раёне на мяжы Беларусі і Расеі аўтамашына з расейцам і дзяўчатамі была затрыманая аператыўнікамі ўпраўлення па наркакантролі і супрацьдзеянні гандлю людзьмі УУС Гомельскага аблвыканкаму».
Гомельскія следчыя распачалі крымінальную справу па ч. 2 арт. 171 КК Рэспублікі Беларусь (арганізацыя або выкарыстанне заняцця прастытуцыяй). Расейскаму грамадзяніну пагражае да 10 гадоў пазбаўлення волі.
Гэта не першы выпадак, калі расейскага грамадзяніна будуць судзіць за спробу вывезці беларускіх дзяўчат для заняцця прастытуцыяй у РФ. У 2017 годзе рэзананс набыла справа 39-гадовага святара Мікалая Кірэева з храму Святых апосталаў Пятра і Паўла ва Ўсяволаскім раёне Ленінградскай вобласці. Паводле следства, бацюшка з красавіка па жнівень 2017 гады вёў перапіску ў сетцы Інтэрнэт з двума жыхаркамі Віцебску. Калі ён атрымаў згоду апошніх на занятак прастытуцыяй за грашовае ўзнагароджанне ў горадзе Санкт-Пецярбургу, 3 жніўня прыбыў у Віцебск з мэтай іх дастаўкі ў Расейскую Федэрацыю. Правёўшы некалькі гутарак з 20-гадовай і 30-гадовай жанчынамі і дасягнуўшы дамоўленасці аб іх вывазе, мужчына быў затрыманы пры пасадцы ў аўтобус «Віцебск-Санкт-Пецярбург». За сутэнёрства Мікалаю Кірэеву прызначылі пакаранне ў выглядзе 5 гадоў 6 месяцаў пазбаўлення волі ў калоніі ўзмоцненага рэжыму з канфіскацыяй маёмасці.
ІІ, belsat.eu