У гандлёвым цэнтры ў штаце Флорыда адбыўся выбух


Каля 20 чалавек пацярпелі ў выніку магутнага выбуху, які прагучаў днём у суботу ў гандлёвым цэнтры Fountains у горадзе Плантэйшн на поўдні штата Флорыда. Прычынай здарэння мог стаць выбух бытавога газу, паведамляюць амерыканскія СМІ.

У выніку выбуху, які адбыўся каля 11:30 раніцы па мясцовым часе, двое чалавек атрымалі сур’ёзныя раненні. Інфармацыі аб загінулых і цяжка параненых людзях няма, усе пацярпелыя ў стабільным стане, адзначае golos-ameriki.ru. Бі-Бі-Сі са спасылкаю на паліцыю паведамляе, што траўмы атрымалі 22 чалавекі.

Імаверна, эпіцэнтрам выбуху стаў пустуючы рэстаран. На месцы выбуху выявілі пашкоджаныя трубы газаправода, аднак пакуль няма афіцыйнага пацверджання таго, што да катастрофы прывёў выбух газу.

Адзін з відавочцаў расказаў мясцоваму тэлеканалу WPLG аб велізарнай успышцы агню, «якая асвяціла ўсё неба». Паводле відавочцы, гэта «выглядала як канец свету». З-за выбуху абрынуўся дах гандлёвага цэнтра, таксама пашкоджанні атрымалі аўтамабілі на стаянцы, сцвярджае CBS4 Miami.

КА belsat.eu

Глядзі таксама
Каментары