У школах гарадоў Докшыцы і Бягомль вучні перайшлі на дыстанцыйнае навучанне. Пра гэта піша «Радыё Свабода».
Як паведамляе РС са спасылкай на райвыканкам, часова закрыць школы пастанавілі ў раённым штабе па барацьбе з распаўсюдам каронавіруснай інфекцыі. Цяпер заняткі праходзяць дыстанцыйна ў гарадскіх школах Докшыцаў і Бягомля. Вучні і настаўнікі выкарыстоўваюць электронныя журналы і дзённікі.
Калі вучням дазволяць пайсці ў школу, невядома. Прынамсі гэты тыдзень навучанне будзе дыстанцыйнае.
У вясковых школах Докшыцкага раёну заняткі аднавіліся пасля падоўжаных вакацыяў, як і ва ўсёй Беларусі. Цяпер школы наведвае каля 40% вучняў, кажуць у аддзеле адукацыі райвыканкаму. Начальніца аддзелу адукацыі пацвердзіла, што перавод гарадскіх школ на дыстанцыйнае навучанне звязаны са складанай эпідэміялагічнай абстаноўкай.
Нагадаем, праз эпідэмію каронавіруса Міністэрства адукацыі двойчы працягвала канікулы на тыдзень: чвэрць мусіла распачацца яшчэ 6 красавіка, але пачалася 20-га. Падчас паездкі ў Гарадзенскую вобласць 17 красавіка Аляксандр Лукашэнка заявіў пра неабходнасць пачынаць навучальны працэс з наступнага тыдня. Паводле яго, «ВРВІ ўжо скончыліся», а ў вёсках наагул ідзе пасяўная – «куды падзець дзяцей»?
ІІ belsat.eu
