Украінскі журналіст Станіслаў Асеяў прысуджаны баевікамі «ДНР» да 15 гадоў пазбаўлення волі нібыта за «шпіянаж». Пра гэта паведамляюць інфармацыйныя рэсурсы сепаратыстаў.
Справай журналіста займаліся мясцовыя чэкісты – «Міністэрства дзяржаўнай бяспекі». «Суд» баевікоў яшчэ ў жніўні прызнаў Асеева вінаватым у «шпіянажы», «публічных закліках да экстрэмісцкай дзейнасці» і «публічных закліках да парушэння тэрытарыяльнай цэласнасці». Яго пакаралі 15 гадамі зняволення ва ўмовах калоніі строгага рэжыму.
Асеяў – пазаштатны аўтар украінскай службы «Радыё Свабода», «Украінскай праўды» і газеты «Зеркало недели» Ён быў адным з нямногіх журналістаў у Данецку, якія працягвалі працаваць у горадзе пасля яго пераходу пад кантроль баевікоў. Публікаваўся пад псеўданімам Станіслаў Васін.
Вясной 2017 года Асеяў знік. Пазней стала вядома, што яго арыштавалі баевікі і абвінавацілі ў шпіянажы.
Вызвалення Асеева патрабуюць міжнародныя праваабарончыя арганізацыі і прадстаўнікі сусветных медыяў.
ІІ belsat.eu
