У Беларусі з'явіцца рэсурс, дзе можна будзе ставіць «лайкі» дзяржаўным арганізацыям

На партале рэйтынгавай ацэнкі можна будзе ацаніць працу дзяржаўных арганізацыяў, якія аказваюць паслугі жыхарам Беларусі. Адпаведнае палажэнне зацверджана пастановай Савету міністраў ад 13 лістапада № 765, паведамляе pravo.by.

Партал ствараецца, каб «павысіць эфектыўнасць працы з грамадзянамі, якасці забеспячэння жыццядзейнасці насельніцтва, адкрытасці дзяржаўных органаў, дэбюракратызацыі дзейнасці дзяржорганаў і арганізацыяў».

Доступ да парталу будзе свабодным і бясплатным, а пакінуць ацэнку дзейнасці той ці іншай арганізацыі змогуць як грамадзяне Беларусі, так і замежнікі. Таксама на партале можна будзе пакідаць каментары.

Уладальнікам парталу рэйтынгавай ацэнкі будзе Міністэрства сувязі і інфарматызацыі, а функцыю адміністравання будзе выконваць навукова-інжынернае рэспубліканскае ўнітарнае прадпрыемства «Інстытут прыкладных праграмных сістэмаў».

ЮВ belsat.eu