У Беларусі стаў кепска працаваць інтэрнэт, шэраг рэсурсаў заблакаваныя

Жыхары сталіцы паведамляюць пра павольную працу інтэрнэту. Шэраг сэрвісаў не працуюць, а некаторыя рэсурсы недасяжныя.

З раніцы сайт незалежнага назірання Zubr.in стаў недасяжным. Выглядае, што старонку заблакавалі па ІР. У сваю чаргу стваральнікі платформы прапаноўваюць карыстальнікам пісаць паведамленні пра парушэнні выбарчага заканадаўства праз Telegram-бот @zubr_assist_bot

Участак для галасавання #21 у Мінскім дзяржаўным лінгвістычным універсітэце. Мінск, Беларусь. 9 жніўня 2020 г. фота: ТК / Belsat.eu

Іншыя карыстальнікі паведамляюць, што павольна грузяцца файлы ў Telegram без проксі-сэрвісаў, кепска працуюць такія сэрвісы, як YouTube, Google, VPN-сэрвісы. Прычым праблемы ўзнікаюць не толькі ў карыстальнікаў мабільнага інтэрнэту, але і стацыянарнага ад Белтэлекам. Пазней паведамленні пра перабоі з інтэрнэтам паступілі з усіх рэгіёнаў Беларусі.

Назіральнікі выказваюць меркаванне, што інтэрнэт у Беларусі мгуць наагул адключыць.

«Думаю, так, хутчэй за ўсё, часова і кропкава (але не факт, што стануць). Прычым у Беларусі заблакаваць інтэрнэт будзе складаней, чым у Кітаі, але прасцей, чым у Расеі», – распавёў TUT.by Міхаіла Клімараў, выканаўчы дырэктар некамерцыйнай арганізацыі «Таварыства абароны інтэрнэту».

Пра праблемы з сувяззю ў Беларусі паведамляе таксама Telegram канал «IT и СОРМ».

Калі ў Беларусі цалкам адключаць інтэрнэт, навіны можна паглядзець у эфіры «Белсату». Наш тэлеканал дасяжны праз спадарожнік «Аstra 4A» (ранейшая назва – «Sirius 4»).

Глядзіце выбарчы вечар на «Белсаце», нават калі заблакуюць інтэрнэт

СК belsat.eu

Hавiны