У Беларусі 1878 новых выпадкаў каронавіруса. Але сацыёлагі не вераць афіцыйным лічбам
За содні ў Беларусі зарэгістравалі 1878 пацыентаў з COVID-19. Пра гэта паведамляе афіцыйны Telegram-канал Міністэрства аховы здароўя.
Паказнік, агучаны 6 снежня, не рэкордны, але блізкі да таго. Рэкорд быў усталяваны напярэдадні і склаў 1896 выпадкаў.
Паводле Міністэрства аховы здароўя, за содні ў краіне памерлі 9 чалавек.
Нагадаем, што сацыёлагі не давяраюць афіцыйным лічбам беларускага ведамства.
У прыклад яны прыводзяць статыстыку суседніх краінаў. У перыяд другой хвалі каронавіруса следам за павелічэннем колькасці хворых рэзка павялічылася і колькасць выпадкаў лятальнага зыходу. І Беларусь тут выняткам быць не можа, кажа аналітык Андрэй Шуман.
«Калі мы разглядаем смяротнасць – яна ў нас фактычна простая лінія. Яна не можа быць простаю лініяй. Яна павінна паўтараць амплітуду актыўных выпадкаў, гэта значыць – быць дугападобнай крывой. А яна – простая лінія. Такога не бывае, вядома. Гэта статыстычная анамалія, якая сведчыць пра тое, што статыстыка не адлюстроўвае рэальнасці», – адзначыў ён.
Падобныя меркаванні ёсць і сярод лекараў.
МГ belsat.eu
