Першым горадам, які прыняў святы агонь, традыцыйна стала Горадня.
Штогод дзеткі са скаўцкага руху ўрачыста ўнеслі лампадку са святым агнём у кафедральны касцёл св. Францішка Ксаверыя. Гэтая традыцыя захоўваецца ўжо больш як 30 гадоў. Віфлеемскае святло міру вернікі ставяць на святочны стол увечары перад Раством.
У Горадню прывезлі агонь з Віфлеема
«Гэта агонь азначае нашае адзінства з усім хрысціянскім светам. Ён сімвалізуе нараджэнне Ісуса Хрыста, які прыносіць любоў у гэты свет. Гэты агеньчык запальваюць у Гроце Віфлеемскім, менавіта там, дзе нарадзіўся Божы Сын і таму ён разыходзіцца па ўсім свеце, як знак супакою, міру, любові», – кажа пробашч гарадзенскага Фарнага касцёлу Ян Кучынскі.
Упершыню гэтую акцыю зладзіла Аўстрыйскае Радыё і Тэлебачанне ў Лінцу ў 1986 годзе ў падтрымку дзяцей-інвалідаў і людзей, якія церпяць нястачу. Калі ў акцыі ўзялі ўдзел каталіцкія скаўты, традыцыя распаўсюдзілася па ўсёй Еўропе. З Пячоры Нараджэння Хрыстова ў Віфлееме, святы агонь перавозяць самалётам у Вену, адкуль ён трапляе ў іншыя краіны.
У Беларусь святло міру прывозяць з Польшчы і далей распаўсюджваюць па беларускіх гарадах, мястэчках і вёсках. З Беларусі агонь вязуць у Расею, у самыя аддаленыя кропкі на кантыненце.
6-га студзеня падчас святкавання Раства паводле грэцкага календара, віфлеемскі агонь будзе перададзены праваслаўным вернікам.
ПВ, фота Васіль Малчанаў/Belsat.eu
