Кіраўнік КДК Іван Церцель, каментуючы на брыфінгу затрыманне Віктара Бабарыкі, заявіў, што ведае, «якія лялькаводы стаяць за ягонай дзейнасцю», піша БелТА.
«Уяўляецца, што Бабарыка спрабуе пагуляць у высакароднасць. Мы ў сваю чаргу ведаем, што лялькаводы, якія стаяць за яго дзейнасцю, асцерагаюцца, што нашы дзеянні прывядуць да атрымання дадзеных і пацвярджэння іх датычнасці да гэтай супрацьпраўнай дзейнасці.
Такімі асобамі з’яўляюцца, мы ведаем, вялікія начальнікі ў «Газпроме», а, можа быць, і вышэй », – сказаў Церцель.
ДФР распачаў шэраг крымінальных спраў паводле:
- арт.243 (ухіленне ад выплаты сум падаткаў і збораў у асабліва буйным памеры);
- арт.235 (легалізацыя сродкаў, здабытых злачынным шляхам);
- арт.210 (крадзеж у асабліва буйным памеры);
- арт.209 (махлярства);
- арт.430 (атрыманне хабару) і арт.431 (дача хабару) Крымінальнага кодэксу.
Церцель таксама пракаментаваў заявы Віктара Бабарыкі, што знойдзеныя ў затрыманых па «справе Белгазпрамбанку» грошы належаць яму.
«Сапраўды, Бабарыка заявіў, што гэтыя грошы належаць яму. Разам з тым мы дакладна ведаем з паказанняў затрыманых асоб, што гэтыя грашовыя сродкі былі незаконна выведзеныя з Беларусі па сістэме афшораў, затым размеркаваныя паміж удзельнікамі супрацьпраўнай дзейнасці ў адпаведнасці з раней абумоўленымі працэнтамі», – дадаў Церцель.
Нагадаем, Віктар Бабарыка быў затрыманы сёння пасля допыту ў ДФР, адвакаты не маглі да яго патрапіць. Агулам па «справе Белгазпрамбанку» затрыманыя каля 20 чалавек.
КА belsat.eu
