За два дні датэрмінова прагаласавалі больш за 790 тысяч беларусаў


У датэрміновым галасаванні на парламенцкіх выбарах узялі ўдзел 11,51 % выбарцаў, паведамляе Цэнтрвыбаркам.

У Берасцейскай вобласці прагаласавалі 10,58 % выбарцаў ад агульнай колькасці, у Віцебскай вобласці – 12,87 %, у Гомельскай – 12,41 %, у Гарадзенскай – 10,08 %, у Менскай вобласці – 11,72 %, у Магілёўскай – 11,97 %.

Крыніца: rec.gov.by

У спісы выбарцаў уключаныя 6 865 834 беларусы. Такім чынам, ужо прагаласавалі больш за 790 000 чалавек. Падчас мінулых парламенцкіх выбараў у 2016 годзе датэрмінова прагаласавалі 9,63 % выбарцаў ці каля 670 000 чалавек.

ВІДЭА
Назіральнік злавіў дзяўчыну, якая спрабавала ўкінуць пачку бюлетэняў на выбарчым участку
2019.11.13 15:14

«Яўка накручваецца вельмі сур’ёзна»

Між тым незалежныя назіральнікі заяўляюць пра шматлікія парушэнні падчас датэрміновага галасавання.

«Па выніках дзвюх дзён датэрміновага галасавання мы бачым, што яўка накручваецца вельмі сур’ёзна», – адзначыў у каментары «Белсату» прэс-сакратар кампаніі «Права выбару» Аляксей Янукевіч.

Суразмоўца падкрэсліў, што 11,51 % – гэта нават самая высокая афіцыйная лічба датэрміновага галасавання за ўвесь час. Дадзеныя ж на акругах, дзе назіраюць прадстаўнікі «Права выбару», даюць цалкам іншыя лічбы – ад 3,1 % у Горадні да 8,2 % у Менску.

Назіральнікі кампаніі зафіксавалі ўжо 159 парушэнняў выбарчага заканадаўства, асноўныя з іх – неналежнае захаванне скрыняў для галасавання і неадпаведнасць колькасць выбарцаў, якія прагаласавалі, паводле звестак камісіяў і назіральнікаў. Ужо пададзена 56 скаргаў.

«Выбары адбываюцца паводле старых адпрацаваных схемаў, адзінае што, з апераджэннем графіку як па яўцы, так і па вырубцы і прэсінгу на кандыдатаў», – падкрэсліў Аляксей Янукевіч.

Скрыні не кантралююцца належным чынам

Завышэнне яўкі фіксуюць і назіральнікі ад кампаніі «Праваабаронцы за свабодныя выбары».

«Датэрміновае галасаванне, якое павінна насіць характар выключэння, калі выбарца не можа прагаласаваць менавіта ў дзень выбараў, у нас носіць характар правіла», – заявіў belsat.eu адзін з кіраўнікоў кампаніі Валянцін Стэфановіч.

Адзначыў ён і несвабодны характар датэрміновага галасавання, калі, паводле шматлікіх сведчанняў, адміністрацыі ВНУ ды прадпрыемстваў «намякаюць», што ўдзел у галасаванні кімсьці кантралюецца.

«Гэта ўсё сведчыць, што некаторыя катэгорыі выбарцаў змушаюцца да датэрміновага галасавання. Ці, як мінімум, гэта носіць арганізаваны характар тымі суб’ектамі, якія ў ніякім разе не з’яўляюцца ўдзельнікамі выбарчага працэсу», – заявіў суразмоўца, назваўшы гэтую з’яву непрыхаваным адміністрацыйным рэсурсам.

Выклікае ў праваабаронцаў і захаванасць выбарчых скрыняў падчас датэрміновага галасавання. На думку Валянціна Стэфановіча, ніякіх механізмаў належнага кантролю за скрынямі няма. Нават відэакамер на ўчастках, як у Расеі, якія б вялі наўпроставую трансляцыю ўвесь час.

Суразмоўца падкрэсліў, што калі працэдура датэрміновага галасавання выклікае недавер, то з гэтым трэба нешта рабіць. А адмова ўладаў прымаць неабходныя захады выклікае яшчэ большы недавер, дадаў ён.

ЮВ belsat.eu

Стужка навінаў