Навукоўцы з Тэхаскага тэхналагічнага ўніверсітэту выявілі, што колькасць прыхільнікаў тэорыі плоскай Зямлі павялічваецца. Прычынаю таму – прагляды відэасюжэтаў на Youtube. Як паведамляе The Guardian, даследчыкі апыталі прыхільнікаў тэорыі на найбуйнейшых канферэнцыях удзельнікаў руху ў Паўночнай Караліне і Каларада, паведамляе «Зеркало недели».
З 30 апытаных навукоўцамі ўдзельнікаў канферэнцый 29 заявілі, што нават і не меркавалі, што Зямля плоская, пакуль не ўбачылі адпаведнае відэа на Youtube.
«Адзіны, хто даведаўся пра тэорыі не з відэахостынгу, адзначыў, што відэа паглядзелі яго дачка і зяць, а затым распавялі яму пра гэта», – заявіла вядучы аўтар даследавання Эшлі Ландрум.
Асобы, якія ўзялі ўдзел у апытанні навукоўцаў прызналіся, што глядзелі відэа пра іншыя канспіралагічныя тэорыі, напрыклад пра 11 верасня або пра высадку астранаўтаў на Месяц, а Youtube пасля прапанаваў ім паглядзець відэа пра плоскую Зямлю. Некаторыя таксама дадалі, што глядзелі падобныя відэа толькі для таго, каб развянчаць міфы, якія распавядаюцца ў іх, але самі паверылі ў тое, што ў іх гаворыцца.
«На Youtube вельмі шмат карыснай інфармацыі, але шмат і дэзынфармацыі. Іх алгарытмы дапамагаюць людзям» ісці за белым трусам «, прапаноўваючы інфармацыю тым, хто найбольш схільны яе ўспрыняць», – падкрэсліла Ландрум.
Яна таксама заявіла, што навукоўцам неабходна ствараць уласныя ролікі, якія змагаліся б з дэзынфармацыяй.
Раней кіраўніца відэасэрвісу Сьюзэн Вайжыцкі заявіла, што Youtube мае намер дадаваць да відэа з канспіралагічнымі тэорыямі спасылкі на «Вікіпедыю». На такі крок відэахостынг вырашыўся пасля таго, як сэрвіс падверглі крытыцы за тое, што ў спісе рэкамендацыяў і аўтаматычным спісе прайгравання пачалі з’яўляцца відэа, што прасоўваюць тэорыю змовы, і іншы падобны кантэнт.
СК, belsat.eu