Тэмай «Пецярбургскага дыялогу» стаў абмен Сянцова на Вышынскага


Удзельнікі «Пецярбургскага дыялогу», што адбываецца ў Кёнігсвінтары пад Бонам у Нямеччыне, па-рознаму адрэагавалі на прапанову Украіны абмяняць Кірыла Вышынскага на Алега Сянцова. У той жа час яны лічаць, што такі абмен стане пазітыўным сігналам, піша DW.com

«Пецярбургскі дыялог», форум грамадзянскіх супольнасцяў Нямеччыны і Расеі. Сёлета ўдзельнікі абмяркоўвалі прапанову прэзідэнта Украіны Уладзіміра Зяленскага вызваліць былога галоўнага рэдактара «РИА Новости – Украина» Кірылы Вышынскага пры ўмове, што Масква адначасова вызваліць украінскага рэжысёра Алега Сянцова, які адбывае пакаранне ў расейскай калоніі па абвінавачанні ў тэрарызме.

Кіраўнік расейскага філіялу Фонду імя Фрыдрыха Наўмана Юліюс фон Фрайтаг-Ларынгхофэн у інтэрв’ю DW адзначыў, што калі зʼявіцца магчымасць ажыццявіць маштабны абмен вязнямі паміж Украінай і Расеяй, то гэта можна будзе толькі вітаць.

«Гэта прыкметна разрадзіць сітуацыю, і калі ў ліку асоб, якія будуць абменьваць, апынуцца і такія вядомыя зняволеныя, як Сянцоў, то будзе яшчэ лепш. Бо пасля прэзідэнцкіх выбараў ва Украіне і словаў Зяленскага пра гатовасць да перамоваў нам патрэбныя пазітыўныя сігналы, і такі абмен вязнямі стаў бы адным з іх», – лічыць нямецкі палітык.

«Схаваны гандаль вакол вязняў недапушчальны»

Іншы нямецкі палітык з партыі «Саюз 90» / «зялёныя» Марылуізэ Бэк адзначыла, што яна рада за любога чалавека, якога выпускаюць на волю. У той жа час яна назвала недапушчальным таемны гандаль вакол зняволеных, паколькі, паводле яе словаў, вядзецца ў першую чаргу пра прававыя нормы і справядлівасць.

«Алег Сянцоў, з улікам ўсіх доказаў, абсалютна невінаваты і знаходзіцца ў турме па сфабрыкаваным абвінавачванні», – нагадала Бэк.

«Сімвал палітычнай разрадкі»

Са свайго боку эксперт фракцыі СДПГ у бундэстагу па вонкавай палітыцы Нільс Шмід выказаў надзею, што вызваленне Алега Сянцова стане «палітычным сігналам і сімвалам нейкай палітычнай разрадкі». Шмід нагадаў, што пытанне Сянцова «зʼяўляецца тэмай практычна любога каментару федэральнага ўраду за апошнія гады».

Палітвязень Алег Сянцоў сустракае шосты дзень народзінаў за кратамі

СК belsat.eu

Глядзі таксама
Каментары