Казахстан працягвае палітыку пераходу з кірыліцы на лацінку. Гэтая ініцыятыва кіраўніцтва краіны выклікала непакой і крытыку ў Расеі. Прэзідэнт Казахстану Касым-Жамарт Такаеў абяцае, што працэс пераходу не будзе гвалтоўным, піша «Комсомольская правда».
Касым-Жамарт Такаеў нагадаў, што працэс пераходу на лацінку ініцыяваў былы прэзідэнт краіны Нурсултан Назарбаеў.
«Сусветная інфармацыйная прастора ў выніку паскоранага ўкаранення новых тэхналогіяў імкліва трансфармуецца. Нашым дзецям трэба арганічна ўпісвацца ў новыя рэаліі, паколькі асноўны інфармацыйны паток абапіраецца на лацінскую графіку. Мадэрнізацыя алфавіту прадыктавана жаданнем пашырыць камунікацыйныя магчымасці нашай мовы», – распавёў Касым-Жамарт Такаеў.
Паводле словаў прэзідэнта Казахстану, пераход на лацінку будзе адбывацца паступова з улікам досведу цэнтральна-азіяцкіх дзяржаваў. Пры гэтым прадугледжваецца рэформа арфаграфіі мовы.
У сваю чаргу ініцыятыва кіраўніцтва Казахстану па пераходзе на лацінку выклікала вострую крытыку з боку Масквы.
СК belsat.eu