5 студзеня прафесар Анатоль Міхайлаў пакінуў пасаду прэзідэнта Еўрапейскага гуманітарнага ўніверсітэту (ЕГУ). Пра гэта паведамляе сайт ВНУ.
«Задаволіўшы заяву аб адстаўцы, Агульны сход суўладальнікаў вырашыў скасаваць пасаду прэзідэнта ЕГУ», – гаворыцца ў паведамленні.
Анатоль Міхайлаў стаў ініцыятарам стварэння ЕГУ ў Менску і з 1992 да 2014 года быў рэктарам універсітэту. З 1 кастрычніка 2014 года ён займаў пасаду прэзідэнта ЕГУ.
Цяпер ужо былы прэзідэнт працягне выкладчыцкую і даследчую дзейнасць у ЕГУ у якасці прафесара філасофіі. Сярод сфераў ягоных навуковых інтарэсаў – фенаменалогія, герменеўтыка і філасофія адукацыі.
Анатоль Міхайлаў нарадзіўся ў 1939 годзе ў Расеі. У 1961 годзе скончыў БДУ, а ў 1966-м атрымаў ступень доктара філасофіі ў Енскім універсітэце імя Фрыдрыха Шылера (Нямеччына). Ён чалец Нацыянальнай акадэміі навук Беларусі і Еўрапейскай акадэміі навук і мастацтваў.
МГ belsat.eu