Вячэра ў Берліне фармаце «Нармандскай чацвёркі» пад пагрозай, але прапанова Мэркель застаецца актуальнай.
Канчаткова пытанне сустрэчы ў Берліне на вячэры ў нямецкай канцлеркі вырашыцца сёння або заўтра ў Менску: гэтымі днямі ў беларускай сталіцы памочнікі лідараў чатырох краінаў абмяркуюць магчымасць нефармальнага саміту.
«Нямецкія калегі прапанавалі правесці 19 кастрычніка нефармальную вячэру з удзелам лідараў «нармандскага фармату», – цытуе памочніка прэзідэнта Расеі Юрыя Ушакова «Інтэрфакс». – Гэтая прапанова застаецца на стале, але яе рэалізацыя будзе залежаць ад таго, наколькі ўдасца да гэтага магчымага саміту дамовіцца аб канкрэтным прагрэсе ў справе ўрэгулявання».
Ушакоў паведаміў, што «гэтым цяпер – сёння і заўтра – будуць займацца непасрэдна памочнікі лідараў «чацвёркі» на сустрэчы ў Менску».
«Паглядзім, якія вынікі яны змогуць прапанаваць лідарам, і пасля гэтага будзе вырашацца пытанне аб правядзенні сустрэчы 19 кастрычніка або аб яе пераносе на больш позні час», – сказаў Ушакоў.
Паводле ягоных словаў, «многае будзе залежаць ад таго, што памочнікі прэзідэнтаў напрацуюць у Менску».
ДД, belsat.eu