Падчас Маршу суседзяў у Беларусі 29 лістапада былі затрыманыя прынамсі трое журналістаў.
Як паведаміў карэспандэнт «Белсату», у Берасці затрымалі журналіста «Брестской газеты» і TUT.BY Станіслава Коршунава, а таксама кіраўніка мясцовай філіі Беларускай асацыяцыі журналістаў Максіма Хлябца.
Іх аўтамабіль спыніла машына ДАІ, якая ехала за імі з мігцелкай. Побач была акцыя, у якой бралі ўдзел каля 40 чалавек. Журналістаў даставілі ў Ленінскі РУУС Берасця, а пасля адпусцілі.
У Менску ж была затрыманая журналістка газеты «Новы Час» Яна Трусіла. Калегі знайшлі яе ў Ленінскім РУУС. Роўна два тыдні таму Яна Трусіла выйшла з-за кратаў пасля 13 сутак арышту, піша БАЖ.
Агулам на гэты момант праваабаронцы паведамляюць пра 254 затрыманых.
Таксама ўвечары 29 лістапада скончыўся тэрмін, на працягу якога журналістцы TUT.BY Кацярыне Барысевіч павінны былі выставіць абвінавачванне і выбраць меру стрымання. Паколькі на свабоду яе не адпусцілі, выданне робіць выснову, што Кацярына знаходзіцца ў статусе абвінавачанай і застаецца пад вартай. Следства ўзяло з адвакатаў падпіску пра неразгалошванне ў самым шырокім значэнні, таму на які тэрмін абрана самая строгая мера стрымання, невядома. Зыходзячы з практыкі, можна меркаваць, што на два месяцы, то бок да 19 студзеня 2021 года.
Кацярыну Барысевіч затрымалі 19 лістапада ў сувязі з крымінальнай справай аб нібыта раскрыцці медычнай таямніцы збітага да смерці Рамана Бандарэнкі (ч.3 арт. 178 КК). Яна прывяла ў артыкуле словы лекара аб адсутнасці ў крыві рамана алкаголю, што супярэчыла заявам прадстаўнікоў уладаў.
Кацярыну спачатку змясцілі ў СІЗА КДБ, затым перавялі ў СІЗА-1.
МГ belsat.eu
Напішы журналісту ліст
Тры беларускія журналісткі ўтрымліваюцца цяпер за кратамі і маюць абвінавачванні паводле крымінальных артыкулаў: Кацярына Андрэева(«Белсат»), Дарʼя Чульцова («Белсат»), Кацярына Барысевіч (TUT.BY).
Адным з моцных спосабаў падтрымаць дзеўчын можа стаць ваш ліст да іх.
Куды пісаць:
Кацярына Андрэева (Бахвалава): 222160 г. Жодзіна, вул. Савецкая, д. 22а.
Дарʼя Чульцова: 222160 г. Жодзіна, вул. Савецкая, д. 22а.
Кацярына Барысевіч: СІЗА № 1, 220030 г. Менск, вул. Валадарскага, д. 2.
Не забудзьцеся ўкласці ў ліст пусты канверт, каб дзеўчыны маглі вам адказаць. Дзякуем за вашую неабыякавасць!