Адсутнасць супастаўных коштаў на газ у Беларусі і Смаленскай вобласці Расеі, а таксама расейскі падатковы манеўр парушаюць дамову аб Еўразійскім саюзе. Пра гэта заявіў амбасадар Беларусі ў Расеі Уладзімір Сямашка.
У інтэрв’ю «Комсомольской правде», стэнаграма якога апублікаваная на сайце беларускага МЗС, ён нагадаў, што краіны два гады таму падпісалі пратакол пра цэнаўтварэнне на газ, згодна з якім мусілі да канца мінулага года выпрацаваць агульную формулу для выхаду на супастаўныя цэны на газ для Беларусі і Смаленскай вобласці Расеі. А 1 ліпеня 2019 года планавалася падпісаць адпаведнае міжурадавае пагадненне.
На думку амбасадара, гэты крок зблізіў б умовы гаспадарання для прадпрыемстваў дзвюх краін і дазволіў бы пачаць вырашаць больш складаныя задачы эканамічнай інтэграцыі.
Але адказаў на беларускія прапановы, што былі накіраваныя ў расейскія ўрад, Міністэрства энергетыкі і «Газпром», не паступала. Падобная сітуацыя і з падатковым манеўрам, адзначыў Сямашка.
Амбасадар нагадаў, што ў ЕАЭЗ павінна быць забяспечаная «узаемавыгадная супраца, раўнапраўе і ўлік нацыянальных інтарэсаў бакоў».
«У Беларусі «манеўр» наносіць двайны ўдар – і па нафтаперапрацоўчай галіне, і па бюджэце. Мы ўжо страцілі 3,6 мільярдаў долараў і можам страціць яшчэ каля 10 мільярдаў», – сказаў ён.
Паводле яго, расейскі ўрад разумее праблемы Беларусі, ужо абмяркоўваюцца кампенсацыйныя механізмы.
Што датычыць магчымага ўвядзення адзінай валюты ды стварэння адзінага мытнага і падатковага заканадаўства, дык для гэтага неабходна, каб Беларусь і Расея выраўнялі эканамічныя ўмовы, сказаў амбасадар.
МГ belsat.eu
