На заяву адрэагаваў чалец Каардынацыйнай рады Павел Латушка.
«Без стварэння легітымнай улады ў Беларусі размаўляць пра заключэнне міжнародна-прававых дакументаў немагчыма. Яны не будуць мець ніякіх прававых наступстваў. Гэта павінны разумець і нашыя расейскія партнёры», – заявіў «Свабодзе» Павел Латушка.
Сёння ж Сямашка заявіў, што Беларусь і Расея прыйшлі да кансэнсусу ў пытанні цаны на газ у 2021 годзе.
Паводле Сямашкі, ён сустракаўся са старшынём праўлення «Газпраму» Аляксеем Мілерам у Санкт-Пецярбургу.
«Мы прасунуліся ў разуменні. Нюансы не буду гаварыць. Плённа папрацавалі, пагаварылі, знайшлі ў галоўных пытаннях кансэнсус. Гэта будзе паэтапны рух. Хутчэй, усяго, нейкі крок будзе ўжо з 1 студзеня 2021 года», – сказаў Сямашка.
На думку амбасадара, агульны рынак газу ў Саюзнай дзяржаве «можна стварыць з 1 студзеня 2022 года».
Кіраўнік «Газпраму» Мілер у канцы траўня заявіў, што беларускі бок назапасіў доўг за пастаўкі газу з пачатку гэтага года ў памеры $165,57 млн. У Мінэнерга Беларусі ў сваю чаргу заявілі пра адсутнасць доўгу, але канстатавалі рознагалоссі па вызначэнні кошту прыроднага газу, які пастаўляецца з улікам яго каларыйнасці.
Пазней паведамлялася, што сума запазычанасці Беларусі за газ перад «Газпрамам» вырасла з $ 165,6 млн у канцы траўня да $ 273 млн. Беларусь штогод імпартуе з РФ каля 20 млрд куб. м газу. Пры гэтым Менск неаднаразова прапаноўваў знізіць кошт на газ да ўзроўню Смаленскай вобласці.