Кандыдатка на прэзідэнта планавала наведаць жанчын, якія абвесцілі галадоўку. Але праз сямейныя праблемы прыехаць не змагла.
10:50. Вольга Кавалькова ў размове з актывісткамі распавяла, што цалкам скасаваць артыкул 328 КК нерэальна. Яна адзначае, што галоўная праблема ў тым, што ў Беларусі няма незалежных судоў і мізэрны адсотак апраўдальных прысудаў.
10:32. Да актывістак у Пухавіцкім раёне прыехалі прадстаўнікі штабу Ціханоўскай. Вольга Кавалькова распавяла, што Святлана не змагла прыехаць праз сямейныя, асабістыя праблемы.
10:07. Стала вядома, што Святлана Ціханоўская асабіста не зможа наведаць актывістак. Замест яе прыедуць прадстаўніцы яе штабу. У чым прычына змены планаў Ціханоўскай – пакуль не паведамляецца.
Актывісткі выказваюць спадзеў, што Ціханоўская пераможа на выбарах. Адна з жанчын кажа, што Лукашэнка пасадзіў іх дзяцей у турмы і ён мусіць сысці. «Бог вам суддзя – пакайцеся пакуль не позна!» – заявіла яна.
***
22 ліпеня кандыдатка на прэзідэнта Святлана Ціханоўская планавала наведаць актывістак руху «Маці 328», якія абвесцілі галадоўку 16 ліпеня. Жанчыны змагаюцца за справядлівыя прысуды і змяншэнне тэрмінаў зняволення паводле артыкулу № 328 Крымінальнага кодэксу.
«Белсат» зладзіў стрым з сустрэчы Святланы Ціханоўскай і актывістак Матчынага руху. Стрым можна было паглядзець на антэнне, YouTube і ў сацыяльных сетках.
ВЯ Belsat.eu
