Святлана Ціханоўская абвясціла, што яна сабрала неабходныя 100 тысячаў подпісаў
І адзначыла, што сябры ініцыятыўнай групы сутыкаюцца з моцным ціскам.
Святлана Ціханоўская абвясціла, што ейная ініцыятыўная група сабрала 100 тысячаў подпісаў, перадае «Радыё Свабода». Але ў каментары адразу зазначыла:
«Фактычна яны ёсць, але ці паспеем мы іх здаць фізічна, бо ўмовы не на нашу карысць… Але мы вельмі стараемся гэта зрабіць».
Таксама Святлана дадала, што на чальцоў групы ідзе моцны ціск. На яе саму – не, аднак ёй усё роўна вельмі цяжка эмацыйна і псіхалагічна. З-за таго, што кіраўнік штабу – ейны муж Сяргей Ціханоўскі – зараз у СІЗА КДБ, яна мусіць сама паехаць па розных гарадах Беларусі і сабраць подпісы.
«Мне трэба зрабіць гэта дзеля тых людзей, якія так шмат працавалі, збіралі подпісы і ў дождж і ў спёку, якія стаялі ў вялікіх чэргах, каб падпісацца. Спыніцца зараз было бы здрадай і Сяргею, і людзям, якія паверылі яму, прыйшлі за яго падпісвацца. Тое, што я апынулася на перадавой – гэта проста так атрымалася. Я падвесці яго проста не магу. Калі каханне – то да канца», – гаворыць Святлана.
«Справа Ціханоўскага»
- 29 траўня на пікеце па збору подпісаў за Святлану Ціханоўскую быў затрыманы праз правакацыю блогер Сяргей Ціханоўскі. азней яму і яшчэ 7 людзям было прад’яўленае абвінавачванне за арганізацыю беспарадкаў. Беларускія праваабаронцы прызналі іх палітзняволенымі.
- 3 і 4 чэрвеня на лецішчы ў Ціханоўскіх прайшоў ператрус, падчас якога знайшлі $ 900 тыс. Пазней Ціханоўская абвясціла, што здымае пікеты ў Менску і абласных гарадах з-за ціску, нягледзячы на тое, што людзі стаялі ў чэргах, каб падпісаць за яе і іншых альтэрнатыўных кандыдатаў.
- Збор подпісаў за вылучэнне кандыдатаў у прэзідэнты ў Беларусі праходзіць да 19 чэрвеня. Прэзідэнцкія выбары адбудуцца 9 жніўня.
КТ belsat.eu
