Беларусі патрэбныя структурныя рэформы, бо традыцыйныя крыніцы росту эканомікі вычарпаныя. Пра гэта ў відэазвароце на сайце Сусветнага банку заявіў кіраўнік прадстаўніцтва СБ у Менску Элекс Крэмэр.
На яго думку, структурныя змены дазволяць Беларусі стаць «больш моцнай, квітнеючай і эканамічна незалежнай ». Разам з тым эканаміст прызнаў, што сур’ёзнае пераўтварэнне будзе цяжкім.
«Але чым даўжэй мы чакаем, тым складаней яно будзе. А сацыяльнае ўздзеянне такіх пераўтварэнняў можна змякчыць прынамсі за кошт узмацнення сацыяльных праграм», – адзначыў ён.
Кіраўнік прадстаўніцтва СБ падкрэсліў, што традыцыйныя крыніцы росту беларускай эканомікі – «запазычанні з-за мяжы, павышэнне коштаў на сыравінныя тавары і хуткі эканамічны рост у суседняй Расеі» – вычарпаныя.
Некаторыя прадпрыемствы прадаць, некаторыя – закрыць
Асноўнай праблемай Беларусі Элекс Крэмэр назваў неэфектыўнасць дзяржпрадпрыемстваў. Гэтак, чысты прыбытак дзяржпрадпрыемстваў знізіўся з 5,3% ВУП у 2013 годзе да 1,5% ВУП у 2018-ым, а доля стратных дзяржпрадпрыемстваў вырасла з 7,7% да 12,9%. Таксама істотна вырас дзяржаўны доўг праз тое, што Беларусь брала крэдыты за мяжой часткова на пакрыццё стратаў дзяржпрадпрыемстваў.
Паводле прадстаўніка СБ, некаторыя дзяржпрадпрыемствы трэба прыватызаваць па рынкавых цэнах, а некаторыя – закрыць. Каб зменшыць негатыўны эфект ад закрыцця, на яго думку, трэба забяспечыць звольненым работнікам магчымасць атрымаць дастатковыя дапамогі па беспрацоўі.
Элекс Крэмэр падкрэсліў, што звольненыя работнікі маглі б пайсці працаваць на прыватныя прадпрыемствы, але для гэтага трэба пазбавіцца ад няроўнага стаўлення дзяржавы да прыватных і дзяржаўных прадпрыемстваў. Таксама, дадаў ён, нормы заканадаўства мусяць ужывацца прадказальна і паслядоўна. Калі гэтыя змены будуць выкананыя, пачнецца рост прыток прыватных інвестыцыяў і стварэнне працоўных месцаў у прыватным бізнесе, лічыць прадстаўнік Сусветнага банку.
Трэба разабрацца з субсідыямі на ацяпленне
Таксама, на яго думку, неабходна разабрацца з субсідыямі на ацяпленне. Сітуацыя, калі сем’і аплачваюць толькі 15,6 % яго поўнага кошту, а астатнюю частку аплачваюць або прадпрыемствы за кошт больш высокіх тарыфаў, або дзяржава за кошт субсідыяў, зніжае канкурэнтаздольнасць прадпрыемстваў і патрабуе пастаянных дзяржпазыкаў для такіх субсідыяў, мяркуе кіраўнік прадстаўніцтва СБ у Менску.
Зрабіць так, каб бедныя і сацыяльна неабароненыя сямʼі не пацярпелі ад падвышэння тарыфаў на ацяпленне, можна праз пашырэнне дзейнай праграмы субсідыяў на паслугі ЖКГ, адзначыў Элекс Крэмэр.
МГ belsat.eu
