Свет абмяркоўвае вынікі гістарычнага рэферэндуму.
За выхад з Еўрапейскага Звязу прагаласавала 51.2% выбарнікаў. Супраць было 48.2 %. Агулам у рэферэндуме узялі удзел 71,8 % брытанцаў.
Міністр замежных справаў Нямеччыны Франк-Вальтэр Штайнмаер: «Ранішнія навіны з Вялікай Брытаніі сапраўды ацвярэжваюць. Падобна, што гэта сумны дзень для Еўропы і для Вялікай Брытаніі».
У сваю чаргу лідар Партыі незалежнасці Абʼяднанага Каралеўства Найджэл Фэрыдж назваў вынікі рэферэндуму «перамогаю простых людзей у бітве з вялікімі банкамі, вялікім бізнесам і вялікімі палітыкамі». І запатрабаваў ад Кэмэрана сысці ў адстаўку.
У Карпарацыі лонданскага Сіці не чакаюць масавага сыходу банкаў.
«Мы па-ранейшаму цэнтр пятай па велічыні эканомікі ў свеце. Цяпер задача ў тым, каб праявіць павагу да волі брытанскага народу і забяспечыць лепшыя прапановы падчас перагаворах, якія будуць пасля галасавання», – адзначаюць у карпарацыі.
Міністр замежных справаў Францыі Жан-Марк Эро акрэсліў вынік «сумным для Абʼяднанага каралеўства» і сказаў, што Еўропа мусіць адрэагаваць.
Чэшскі прэмʼер Богуслаў Собатка кажа, што ЕЗ павінен хутка змяніцца, каб узмоцніць падтрымку сваіх грамадзянаў:
«Еўропа мусіць быць гатовай дзейнічаць больш, быць гнуткай, менш бюракратычнай і больш адчувальнай да разнастайнасці, якую ўяўляюць 27 краінаў-сябраў Еўразвязу».
Эдвард Сноўдэн: «Незалежна ад вынікаў, «брэкзіт» паказвае, як хутка палову любога насельніцтва можна ўпэўніць у тым, каб галасаваць супраць сябе ж».
У дзень рэферэндума Standard & Poorʼs заявіла, што Вялікая Брытанія, хутчэй за ўсё, страціць свой крэдытны рэйтынг ААА. У рэйтынгавым агенцтве мяркуюць, што пасля «брэкзіту» такі высокі рэйтынг не адпавядае рэчаіснасці.
НМ, belsat.eu