Лефортаўскі суд Масквы падоўжыў тэрмін арышту васьмярых з 24 украінскіх маракоў да 24 красавіка – іх абвінавачваюць у незаконным перасячэнні расейскай мяжы ў Керчанскай пратоцы, перадае ТАСС з залы суда.
Спачатку суддзя вынесла рашэнне ў дачыненні Рамана Мокрака, Андрэя Апрыскі, Яўгена Семідоцкага і Сяргея Цыбізава. Затым суд пастанавіў падоўжыць тэрмін утрымання пад вартай Багдана Галаваша, Сяргея Папова, Уладзіміра Тэрэшчанкі і Андрэя Шаўчэнкі.
Паседжанне адбывалася ў закрытым рэжыме, прадстаўнікоў СМІ пусцілі толькі на абвяшчэнне рэзалюцыйнай часткі.
25 лістапада ў раёне Керчанскай пратокі расейскія памежнікі абстралялі і захапілі ўкраінскія вайсковыя караблі разам з 24 маракамі. Затрыманых украінцаў даставілі ў Крым і абвінавацілі ў «парушэнні расейскіх межаў». Пазней з Сімферопаля іх адправілі ў СІЗА «Лефортава» у Маскве.
Маракі адмовіліся даваць паказанні на допытах ФСБ, сябе яны назвалі ваеннапалоннымі.
КА, belsat.eu