У Менскім інавацыйным універсітэце спецыяльнасць «транспартная лагістыка» апынулася ў спісе неакрэдытаваных. Цяпер на гэтым курсе навучаюцца 64 чалавека – выпускнікі, у якіх навучанне завяршаецца 26 студзеня. Але выдаць ім дыпломы дзяржаўнага ўзору МІУ не можа. Таму, каб выправіць сітуацыю, ужо неўзабаве студэнтаў перавядуць у БНТУ. Абараняць дыпломны праект і здаваць дзяржэкзамен яны будуць у палітэху.
«Як і абяцала Міністэрства адукацыі, навучальны план МІУ будзе перададзены ў БНТУ. Палітэх яго зацвердзіць, і нашы студэнты завершаць навучанне. Адзначым, што з верасня ў выпускнога курсу «транспартнай лагістыкі» ужо няма заняткаў. Спачатку ў іх была пераддыпломная практыка, цяпер яны працуюць над дыпломамі», – растлумачылі ва ўніверсітэце.
Кіраўніцтва МІУ заяўляе, што мае намер бараніць сваіх выпускнікоў. Адміністрацыя навучальнай установы накіравала лісты ў Мінадукацыі, Адміністрацыю прэзідэнта і Савет міністраў.
«Каб абараніць студэнтаў, мы гатовыя да любых захадаў. Калі спатрэбіцца, пойдзем на пераакрэдытацыю і трансфармуем дыстанцыйнае навучанне ў завочную форму», – адзначылі ў МІУ.
6 лістапада стала вядома, што Міністэрства адукацыі не працягнула акрэдытацыю Менскаму інавацыйнаму ўніверсітэту ў 5 галоўных спецыяльнасцях, на якіх навучаецца каля 1600 студэнтаў. 11 лістапада студэнты Менскага інавацыйнага ўніверсітэту распачалі забастоўку. Навучэнцы не пагадзіліся з пазбаўленнем акрэдытацыі некаторых спецыяльнасцяў гэтай установы. Пазней у ВНУ прыехалі прадстаўнікі Мінадукацыі, якія прапанавалі студэнтам 3 шляхі развязання сітуацыі: падача апеляцыяў на вынікі папярэдняй камісіі, паўторнае праходжанне акрэдытацыі ці перавод студэнтаў у іншыя ВНУ без здавання акадэмічнай розніцы.
Адміністрацыя ВНУ накіравала апеляцыю на не працягненне акрэдытацыі.
СК belsat.eu
