Сілавікі адкрылі агонь па людзях на Кальварыйскай. Паведамляецца, што стралялі людзі ў форме колеру хакі з мосту на вуліцы Кальварыйскай.
Унутраныя войскі стаяць з аўтаматамі. Адлегласць да пратэстоўцаў – каля 100 метраў. Частка людзей хаваецца ў ГЦ «Карона».
Была страляніна паміж Пушкінскай і Кальварыйскай, людзей адціснулі, зараз ідуць да другога кальца. Мінакі кажуць, што каля метро «Фрунзенская» людзі аўтамабілямі перакрылі кальцо.
Нашыя журналісты паведамляюць пра 10 тысяч чалавек на Пушкінскай. Людзі будуюць барыкады з кветнікаў і падручных прадметаў.
Каля ст. м. «Пушкінская» тысячы людзей, каля гатэлю «Аўрора», на плошчы, у парках. Прыватныя машыны заблакавалі бліжэйшыя вуліцы. АМАП і аўтазакі не могуць нікуды ехаць.
Паводле галоўнага рэдактара «Нашай Нівы», параненую журналістку Наталлю Лубнеўскую адвезлі ў шпіталь. Яна не адчувае нагі. Беларуская асацыяцыя журналістаў заяўляе, што на Кальварыйскай стралялі менавіта ў журналістаў.
Яшчэ адна гумовая куля зачапіла журналістку TUT.BY, ёй зрэзала бэйдж. Журналісты стаялі групай, былі апранутыя ў адмысловыя камізэлькі для прэсы.
Людзі на Пушкінскай залезлі на аўтобусы, паведамляе «Еўрарадыё». Відавочца паведаміў belsat.eu, што на Пушкінскай гарыць тралейбус. Аднак паводле новай інфармацыі, гэта фаер.
На скрыжаванні пр. Пушкіна і Прытыцкага шмат аўтаў, людзі са сцягамі. Вельмі даўгая чарга, аўты мінімальна рухаюцца, усе сігналяць, у тым ліку грузавікі. Калона прыкладна ў 100 чалавек ідзе ў бок вул. Прытыцкага.
Telegram-каналы паведамляюць, што ў раёне Кальварыйскай чутны выбухі. Верагодна, сілавікі зноў выкарыстоўваюць святлошумавыя гранаты.
